Orain bost urte DBHko ikasleek behar dituzten kontzeptuak Wikipedian lantzen buru-belarri jarri ginen, gure Hezkuntza Programaren baitan. Heziberri curriculum dekretua ikusita, bertan zehar-lerro gisa agertzen ziren emakumeari eta generoari buruzko hainbat kontzeptu. Ez dira, berez, ikasgai zehatz baten parte, baina zerrendan baziren. Eremu hau da gehien hazi dena azken bost urteotan, lehen baino 10 aldiz eduki gehiago baitugu… hala ere, borobildu ezinik gabiltza, gai batzuk lantzeko ezinean.

Egindakoa

Hobetu beharreko artikuluak biltzeko prozesuan 70 elementu aurkitu genituen, han-hemenka. Horietatik 46 egin gabe zeuden. Bai, hau zen proiektua hasi genuenean hutsunerik larriena. Artikuluen batezbestekoa 1.647 bytekoa zen, oso txikia. Gaur egun 17.705 byte dituzte artikuluek, eta soilik bederatzi falta zaizkigu egiteko. Baina hortxe gaude, horiei heltzeko zailtasunekin, orain dela bi urte. Falta diren artikuluak hemen daude, kolore gorriz: https://eu.wikipedia.org/wiki/Atari:Hezkuntza/Emakumea_eta_generoa. Artikulu oso orokorrak dira, baina aukera handiekin, emakume asko zerrendatu eta horien inguruko ezagutza handitzeko aukera ematen digutelako.

Falta dena

Goian aipatutako bederatzi artikulu horiez gain, badira beste bi artikulu garrantzitsu, tamaina ertaina dutenak, baina 30.000 bytetik gora beharko genituzkeenak: emakume eta feminismo. Bi artikuluak Wikipedia guztiek izan beharreko 1.000 artikuluen zerrendaren parte dira. Horiek ere hedatzea, funtsezkoa da guretzat.

Gehiago irakurri

Gure hezkuntza proiektua maratoia da, epe luzera begira. Artikuluak hobetu ditugu, pixkanaka, fakultatez fakultate eta wikilarion esfortzuarekin. Bada, ordea, azken sprintean hobetu den eremu bat: gorputz hezkuntza. Fakultate bakarra dago Euskal Herrian gorputz hezkuntzako gaiak lantzeko, Araban dagoen Kirol eta Hezkuntza Fakultatea. Eurekin izan gara proiektuaren hasieratik, kirolen inguruko artikuluak hobetzen saiatzen, baina azken urte honetan artikuluetan egindako hobekuntza nabarmena izan da, kirol olinpiko (ia) guztiak egoera bikainean utzita.

Pausoz pauso

Gorputz Hezkuntza ez da soilik kirola. Jarduera osasuntsuak eta gorputzaren ezagutza ere sartzen dira, anatomiari lotutako gaiekin, adibidez. Horregatik, zaila izan da corpus on bat sortzea eta horrekin aurrera joatea. Sei hilabetero egin dugun egoeraren azterketak grafiko hau eskaini digu:

Argi ikusten denez, artikulurik laburrenak ia desagertu dira, eta 15.000 bytetik gorako artikuluen igoera izugarria izan da azken urtean. Une honetan 20.000 eta 30.000 byte arteko artikuluak dira talderik handiena, hasieran ezinezkoa ematen zuena.

Artikulu txiki ugari zituen eremua zen. Batezbesteko tamaina 4.276 byte zen, eta 16.675 byte da oraintxe. Hau da, ia laukoiztu dugu artikuluen luzera. Kirol ezagun batzuek dute ardura: Futbol eta Olinpiar Jokoak artikuluek 50.000 bytetik gora dute jada, lehen aldiz.

Azken txanpa

Eta zer dugu, bada, egiteke? Une honetan, Wikipedia guztiek izan beharreko 1.000 artikuluen zerrendan eta gure hezkuntza programako zerrendan dauden bost artikulu ditugu borobiltzeke: judo, tabako, muskulu, kirol eta joko. Ez dira errazak, baina lorgarriak. Eta, gainera, Gorputz Hezkuntzak duen aniztasunaren berri ematen dute: kirolak, anatomia eta bizitza osasungarria. Animatuko al zara artikulu hauek hobetzera?

Gehiago irakurri

Matematikari buruzko artikuluan aipatzen genizuen bezala, orain 5 urte erronka bat ekin genion: DBHko ikasleek behar dituzten oinarrizko kontzeptu guztiak euskarazko Wikipedian kalitatez egotea. Biologian eta geologian 200 gai zerrendatu genituen, eta horiek hobetzen aritu gara, bereziki UPV/EHUko Zientzia eta Teknologia fakultateko ikasleekin, baina ez soilik. Kontsulta gehien dituzten artikuluetako batzuk daude kategoria honetan: Lurra, zelula, sumendi edo ekosistema, adibidez. Bost urte hauetan edukia laukoiztu dugu: 6.917 byte zen artikuluen batez bestekoa proiektuarekin hasi ginenean, eta 27.569 byte dira oraintxe, igoera nabarmena.

Nola geunden, nola gauden

Proiektua hasi genuenean, artikuluen erdia baino gehiagok 5.000 byte baino gutxiago pisatzen zuten. Gainera, 15 artikulu ez ziren existitzen. Gorputzeko sistemak edo Lurra artikulua bera datuen bilduma txikia ziren. Eboluzioari buruzko kontzeptuak han-hemenka zeuden, baina oraindik osatu gabe (gaur egun ere, eboluzio artikuluak hutsuneak ditu). Oso luze gisa sailkatuta (50.000 bytetik gora) 3 artikulu baino ez genituen une hartan.

Oso bestelakoa da egoera orain, 31 artikulurekin 50.000 bytetik gora eta artikulurik gabe 4.000 bytetik behera. Grafiko honetan bildu dugu 6 hilabetero egindako aurrerapenak.

Gainera, bideo bilduma berria abiatu dugu Ikusgela proiektuaren barruan, Aitor Cevidanes biologoarekin batera ekologia eta natura lotzen saiatzeko.

Egiteke duguna

Artikulu batzuk osatu behar ditugu oraindik, noski. Badira labur diren gutxi batzuk bilduman. Eta badira, gainera, Wikipedia guztiek izan beharreko 1.000 artikuluen zerrendan zein DBHko ikasleen zerrendan agertzen diren beste batzuk. Horien artean 9 artikulu hauek hobetzea izango litzateke gure uneko erronkarik handiena, bi zerrendatan, aldi berean, gora egiteko.

Artikuluen zerrenda ikusi edo hobetu nahi baduzu, hemen duzu lotura: https://eu.wikipedia.org/wiki/Atari:Hezkuntza/Biologia_eta_geologia.

Gehiago irakurri

Orain bost urte epe luzeko erronka bati ekin genion: DBHko ikasleek behar dituzten kontzeptu guztiak euskarazko Wikipedian txukun egotea. Horretarako Eusko Jaurlaritzaren Hizkuntza Politika Sailburuordetzaren laguntza izan genuen. Milaka izan dira gurekin batera erronka honetan parte hartu duten ikasle, irakasle eta wikilariak. Pixkanaka, erronkari eutsi eta lortu dugu. 2023 urtean borobiltzea proposatu dugu: DBHko ikasleek behar dituzten artikuluak eta Wikipedia guztiek izan beharreko 1.000 artikuluen zerrendan daudenak hartu, eta horiek guztiek 30.000 bytetik gora izatea izan da gure buruari jarri diogun erronka. Urtearen lehen erdia igaro den honetan, erronkaren egoerari begiratu behar diogu, eta lehen gaiarekin hasiko gara: Matematika.

Nola geunden, nola gauden

Proiektua hasi genuenean, DBHn ikasten diren 100 gai zerrendatu genituen. Horietatik 11 ez ziren existitzen euskarazko Wikipedian. Beste erdia (44) 2.000 bytetik beherakoak ziren, hau da, paragrafo pare bat zuten gehienez. Matematika zen, gainera, arlorik zailenetako bat hazkuntzarako: prosa errazagoa da historian edo biologian, matematikan maiz formula soilak izaten baitira azalpenaren funtsa. Artikuluen batezbesteko tamaina 4.246 byte zen.

Bost urte eta gero, artikulu guztiak sortuta ditugu, ez dago 3.000 byte baino laburragoa den artikulurik eta batezbesteko tamaina 13.185 da. Hau da, %210 hazi dira artikuluak. Histograma honetan ikus daiteke sei hilabetero egindako hobekuntza:

Artikuluen tamaina se hilabetero. Azken lerro urdinak 2023ko ekaineko egoera adierazten du. Ikusten denez, artikulu luzeak hazi dira, eta artikulu laburrak desagertu dira.

Gainera, Jakindun elkartearekin aritu gara matematikako bideoak askatu eta igotzen. Elkarlanari esker, hainbat artikuluak azalpen gehigarria dute bideo bidez, DBHko ikasleek maiz behar duten laguntza gehigarria eskainiz.

Egiteke duguna

Esan bezala, aurten jarri dugun erronka da DBHko ikasleek behar dituzten gaien eta Wikipedia guztiek izan beharreko artikuluen intersekzioan daudenak hobetzea. Bigarren zerrenda honetan “artikulu luze” gisa agertzeko 30.000 bytetik gora izan behar dute artikuluek. Funtsezko gaiak izanda, ariketa hau egingarria dela pentsatu genuen. Lerro hauek idazten ari garela, bost baino ez dira falta diren artikuluak erronka betetzeko: Pitagorasen teorema, azalera, zenbaki, pi (zenbakia) eta probabilitate, azken hau oso gertu.

Hala ere, bestelako artikuluak hobetzen ere lagun dezakezu, noski. Landuta artikulu guztien zerrenda ikusi nahi baduzu, hemen dago eskuragarri: https://eu.wikipedia.org/wiki/Atari:Hezkuntza/Matematika. Lortuko dugu!

Gehiago irakurri

Frisia, Irlanda eta Euskal Herriko wikilari eta irakasleak batuko dituen Erasmus+ proiektuaren formakuntza saioak egin ditugu egunotan Donostian. Hurrengo bi urteotan, Antiguako Luberri BHIko ikasleek Monaghan eta Leeuwardeneko ikasleekin batera gure herrietako emakumeen inguruan idatziko dute.

Frisiako Mercator European Research Centre, Algemiene Fryske Ûnderrjocht Kommisje (AFÛK) eta Learning Hub Friesland taldeen laguntzarekin, Erasmus+ proiektua abiatu dugu Euskal Wikilarien Kultura Elkarteak eta Antigua-Luberri BHIk. Gurekin batera arituko dira Wikimedia Community Ireland eta Coláiste Oiriall irlandarrak. Helburua herrialde bakoitzeko emakumeen biografiak Wikipediara igotzea izango da, eta prozesu hori nola egin dugun azaltzen duen material pedagogikoa sortzea, Europako gainontzeko eskolatan erabili ahal izateko.

Lehen urratsak aurten Leeuwardenen eman bagenituen ere, irakasleen formazioaren txanda izan da 2022ko ekaineko azken astean, eta horretarako bildu gara Gipuzkoan lau egunez. Irakasle eta antolatzaileekin batera eztabaidatu dugu nola sortu artikuluak Wikipedian, zein den Copyrightaren garrantzia, emakumeen biografiekin egon ohi den desoreka edo hizkuntza batean ahots grabazioak egiteko erabili daitekeen softwarea. Gainera, mundu mailako beste proiektu batzuen ingurukoak entzun ditugu eta Zumaia BHIko Txikipedia proiektua azaldu diegu.

Irakasle eta antolatzaileekin inguruan egin daitezkeen beste kultura-jarduera batzuk ere antolatu ditugu. Erasmus+ proiektuaren helburuen artean museo eta artxiboekin lan egiteko aukera ere aztertu behar da. Horretarako Albaolan izan ginen, Hondalea bisitatu genuen eta Zumaian flyscharen inguruko argibideak izan genituen.

2023 eta 2024 urteetan hiru truke antolatuko ditugu hiru eskolen artean. Bakoitzean trukean doazen ikasleek beste herrietako emakumeen artikuluak sortu beharko dituzte, hala nola euren kulturari buruz ikasi. Lehenengo trukea 2023ko martxoan izango da, Monaghanera.

Gehiago irakurri

Joan zen astean Ikusgela proiektuaren berri eman genizuen, bideo pedagogiko libreekin Wikipedia elikatzeko helburu duen lana. Proiektu hori garatzen ari ginela matematika, fisika eta kimikako bideo praktikoak garatzeko proposamena jaso genuen. Bideoak berriro egin baino, Jakindun elkartearekin jarri ginen harremanetan, gai horiei buruzko ia 400 bideo sarean jada dituen ekimena. Euren bideoak askatzeko akordioa lortu dugu, eta euren YouTube kanalean izateaz gain, dagoeneko euskarazko Wikipediako hamarnaka artikulu osatzen ikus ditzakezue.

Bideo pedagogikoen beharra

Euskal Wikilarien Kultura Elkarteak bideo pedagogikoen beharrean sakondu du azken hilabeteotan. Hortik jaio da, besteak beste, Ikusgela proiektua. Hala ere, proiektua garatzen ari ginela, hainbat adituk aipatu ziguten matematika, fisika eta kimikako ariketen azalpenak eskaintzen dituzten bideoak beharrezkoak direla euskaraz. Horrelako bideoak maiz kontsultatzen dituzte ikasleek, baina euskarazko eskaintza ez da aurkitzen erraza. Ikusgelak bideoak bestelako moldekoak zituela ikusita, esparru honetan egindakoa zer den aztertzen hasi ginen, eta laster aurkitu genuen aukera: Jakindun elkarteak garatutako ehunka bideoak.

Eurekin harremanetan jarri ginen, eta bideo horiek lizentzia librearekin uzteko aukerak aztertu genituen. Wikipedian txertatzea guztiontzat aukera ona zela ikusita, bideo guztiak igotzeko prozesuarekin hasi ginen ostean.

Bideoak artikuluetan txertatzea

Bi bideo mota egiten ditu Jakindunek. Alde batetik, gai baten azalpena eskaintzen duten bideoak daude, teoriaren ikuspegitik. Bideo hauek artikuluen goiko aldean txertatzea da egokiena, azalpen orokor bat eskaintzen dutelako. Horren adibide bat duzue “berreketa” artikuluan.

Bestetik, bideoen gehiengoa dugu, ariketa zehatzak ebazten ikasteko balio dutenak. Finean, matematika, fisika eta kimikan ohikoa da azterketak ariketak izatea, eta ez hainbeste teoria. Horregatik, bideo horiekin atal berezia egin dugu. “Berreketak” artikuluan dugu ere adibide bat, behean dagoen “Ariketak” atalarekin:

Bideoa duten artikuluak identifikatzea

Jakindunen bideoak dituzten artikuluak identifikatzeko bi sistema ere ezarri ditugu. Alde batetik, bideo bakoitzaren azpian kategoria bati lotura dago: “Jakindunen bideoak dituzten artikuluak“. Bertan kontsulta daitezke bideoa duten guztiak.

Bestetik, Hezkuntza Atarian ere artikulu bakoitzaren aurrean ikono bat jarri dugu, ariketak dituela argiago gera dadin:

Gehiago irakurri

Bideo pedagogikoak, euskaraz eta libreak

Azalpen bideoetan espezializatutako proiektua da Ikusgela. Sarean euskararen presentzia areagotzeko eta euskarazko Wikipedia osatzeko helburua du. Ikasleei zein landutako gaietan interesa dutenei erakargarria egingo zaien tonu freskoarekin, baita narratiba berrietara egokitutako lengoaia eta baliabideak erabiliz ere. Bideo guztiak, gainera, eduki libreekin osatu dira, eta sortutako materiala ere librea izango da, sarean aritzeko modu baten erakusgarri.

Webgune bat du, baina proiektuaren funtsa ez da edukiontzia; edukia bera baizik. Horregatik, webguneak baino garrantzi handiagoa du Wikipediak eta Youtubeko kanalak; baita eduki hori sare sozialetan zabaldu eta sustatzeko bide berritzaileak aurkitzeak ere. Ikusgelak zubi lana ere egin nahi du: euskara eremu formalean soilik erabiltzen dutenak eraman nahi ditu eremu informalean ere euskarazko edukiak ikustera.

Euskal Wikilarien Kultura Elkarteak koordinatzen du proiektua, Eusko Jaurlaritzak diruz babestu eta Hiru Damatxok ikus-entzunezkoen adarra jartzen du. Hasiera puntua 2019an du, UEU-EWKE Humanitate Digitalen lehenengo ikerketa-beka irabazi zuen “Esplorazio ikerketa sareko euskarazko ikus-entzunezko eduki pedagogiko libreen sortze prozesurako” proiektuarekin. Ikerketa egin ondoren 2deon prototipo bat egiteko aukera lortu zuen proiektuak. Horren ostean Eusko Jaurlaritzako Kultura eta Hizkuntza Politika Sailak babesa eman dio ekimenari eta honela jaio da Ikusgela.

Hannah Arendt eta Simone de Beauvoir

Hego Euskal Herrian aurten lehen aldiz sartuko dira Hannah Arendt eta Simone de Beauvoir filosofoak Unibertsitatera Sartzeko Ebaluazioan, eta bi autore horien gaineko bideo banarekin hasi du ibilbidea Ikusgelak, eskolako edukiak lantzerakoan sumatzen zen gabezia bat arindu asmoz. Dagoeneko sarean daude bi bideoak, autoreek Wikipedian duten sarreran, Ikusgelaren sare sozialetan eta www.ikusgela.eus atarian. Lehen bi bideo horiek sortzeko aholkulari akademiko gisa jardun dute Agora Filosofia Elkarteko eta UPV-EHUko Joxe Azurmendi Katedrako kideek. Ikus-entzunezkoaren alorrean Hiru Damatxo ekoiztetxea aritu da bideoak sortzen. Sail honetako ahotsa Klara Badiolak jarri du.

Irailean indartsu

Uda ostean ekingo dio Ikusgelak bere jardun osoari, iraila erdian aurkeztuko dira lehen ikasturteko sailak. Batzuetan animazio teknikak erabiliko dira, beste batzuetan aurkezle batek gidatuko du edukia. Hainbat jakintza esparruren gaineko azalpen bideo pedagogikoak egitea da asmoa, libreak eta euskaraz.

Gehiago irakurri

Hirugarren urtez UEU-EWKE Humanitate Digitalen Beka proposatu dugu 2021ean. Lehenengo deialdian proposamen bakarra aurkeztu zenez, berriro ireki zen proiektuak jasotzeko aukera. Epe berria 2022ko urtarrilean amaitu zen, eta epaimahaia (UEUko bi ordezkari eta EWKE batek osatua) 2022ko otsailaren 10ean bildu zen, telematikoki.

Proposamenak aztertu ostean, bi beka ematea adostu zen, honako proiektuei:

Be[di]girada – Gizaki digitalaren eta digitalizazio gizatiarraren lanketa hezkuntzan integratzeko proposamena

Proiektu honek filosofiaren esparruan ikerketa egin nahi du material didaktiko osagarria, gamifikazioa eta Wikimedia kontuan hartuta. Proiektua interesekoa zela ikusi zuen epaimahaiak, humanitate digitalei duen loturagatik, askotan zaila den filosofiaren esparruari lotzen zaiolako, eta gamifikazioaren ideiak Wikimedian izan dezakeen bideak aztertzea interesgarri deritzolako.

Proietkuaren egileak Amaia Arroyo Sagasta, Hezkuntza eta Komunikazioan doktorea eta HUHEZIko irakaslea eta Egoitz De La Iglesia, Filosofian doktorea izan dira.

XVIII. mendeko Araba, Bizkai eta Gipuzkoako argitalpenen zerrenda laburra

Egitasmo honen asmoa da XVIII. mendean Araba, Bizkai eta Gipuzkoan argitaratutako idazlanen zerrenda partzial baina anbiziotsu bat ateratzea. Horretarako, lagin adierazgarri bat aterako da epe horretarako Lau Haizetara katalogotik eta Sancho el Sabio Fundaziotik; Bilketari eta Nafarroako Liburutegiari ere erreparatuko zaie. Ezagutza libreaz erabiltzaile digitalei informazio hori eskueran jarriz, hainbat arlotan baliatu ahal izango da ikerketan zein hezkuntzan, Euskal Herriko irudi oso bat eskuratzeko oinarriak finkatuz. Halaber, elementu bibliografiko horiei buruzko euskarazko Wikipedia artikuluak egiteko aukerak zabalduko ditu.

Proiektua Iñaki Lopez de Luzuriagak egin du, Euskal Filologian lizentziatua, itzultzailea eta Humanitate Digitalen Aditu tituluko ikasleak.

____________________________

Proiektuak 2022an zehar garatuko dituzte, eta horretarako bai UEUren zein Errenteriako Udalaren Torrekuako baliabideak erabiltzeko aukera izango dute. Euskal Wikilarien Kultura Elkarteak eta Udako Euskal Unibertsitateak aukera asko ikusten dituzte Humanitate Digitalen inguruan ikerketak bultzatzen jarraitzeko.

Interneten, 2022ko otsailaren 10ean

Gehiago irakurri

Aurrekoan parkean nengoen umeekin eta konturatu nintzen zuhaitzak loratzen hasi zirela. Eta niri, hanamia erromantikoa iruditzen zaidanez, jakin nahi nuen zeintzuk ziren parke horretan ikusten nituen zuhaitzak.

Seek aplikazioa ireki nuen eta laster izan nuen erantzuna. Lore arrosa argiak dituztenak gerezi-aranondoak dira (Prunus cerasifera); lore txuriak dituztenak txinako udareondoak (Pyrus calleryana). Biak dira landatutako zuhaitzak, ez dira bertakoak, baina gure parke askotan egoten diren bi landare ohiko dira.

Gaur ariketa sinple bat proposatu nahi dizuet, gure inguruan ditugun zuhaitzak hobeto ezagutzeko aukera emango diguna: zergatik ez dokumentatu gure parkean (eskolako zelaian, pasealekuan…) dauden zuhaitzak? Hiru tresna erabiliko ditut: Seek edo iNaturalist (nahiago duzuena) espezieak aurkitzeko. OpenStreetMap mapan jartzeko. Wikimedia Commons argazkiak partekatzeko.

Espezieak identifikatzea: Seek edo iNaturalist

Seek edo iNaturalist espezieak identifikatzen lagunduko diguten bi aplikazio dira. iNaturalisten biologo ugari biltzen dira, eta aukera dugu espezie horien inguruko informazio askoz gehiago lortzeko. Komunitate horrek gure identifikazioak zuzenduko ditu, zehatzago egingo ditu eta, gainera, lagunduko dugu ikerketak egiten. Adibidez, landare zehatz batzuk noiz loratzen diren ikertzen aldaketa klimatikoa iker daiteke.

Bigarren aukera Seek da. Umeentzat pentsatutako iNaturalisten tresna da. Lotu dezakegu ere gure iNaturalist kontuarekin baina, nahi ez badugu, ez du geolokalizaziorik eskaintzen. Gainera, aukera dugu errealitate areagotuarekin zuzenean espeziea identifikatzen saiatzeko.

Nik Seek ireki nuen, loreetara begira jarri kamera eta hortxe izan nuen erantzuna: txinako udareondoa lehena, gerezi-aranondoa bigarrena. Informazioa iNaturalistera ere bidali nuen, ikerketan lagungarri izan dadin.

Seek eta iNaturalist erabiltzeko argibide gehiago, eta eskolan erabiltzeko argibideak dituzue gure hezkuntza atarian: https://eu.wikipedia.org/wiki/Atari:Hezkuntza/Lehen_Hezkuntza/BioBlitz

Argazkiak Commonsera igotzea

Hau pauso sinplea da, eta askotan ahazten zaiguna mugikorrarekin argazkiak egiten ditugunean. Commons aplikazioa jaitsi, eta erraza da egiten ditugun argazkiak hor partekatzea. Nire kasuan “Trees in Zarautz” kategoria sortu dut, hor ordenatuta izateko egiten ditudan zuhaitzen argazkiak. Argazkiak igotzen, gure ingurunea hobeto ezagutzen laguntzen dugu eta ezagutza hori partekatzen dugu.

Umeekin Wikimedia Commons ezagutzeko argibideak dituzu hemen: https://eu.wikipedia.org/wiki/Atari:Hezkuntza/Lehen_Hezkuntza/Wikimedia_Commons_ezagutu

Mapagintza ariketa sinple bat: OpenStreetMap

Mapa batean zuhaitz hauek agertzea interesgarria da. Ez soilik gure ingurua hobeto ulertzen laguntzen digulako, baita ere hezkuntzan egin dezakegun ariketa bat delako.

Zarauzko mapa ireki dut OpenStreetMapen, aldatzeko aukerari eman diot eta, pixkanaka, informazioa gehitzen joan naiz. Lehenengo pausoa, lekua topatzea eta zuhaitzak non dauden ikustea da.

Aldatzeko botoiari ematen diogunean, lekua topatuko dugu. Lehen zuhaitza jarri dut, goian erdian.

Bigarren pausoa, zuhaitz hori zer den identifikatzea. Wikidata erabilita, hau oso erraza da, euskaraz ere egin baitaiteke:

Puntua gehitzeko aukerari ematea da lehenengo gauza.
Tree aukeratu (zati hau itzuli gabe dagoela ematen du)
Zuhaitza hostoerorkorra dela jarri, eta zein den espeziea gehitu behean. Gure kasuan, Txinako udareondoa.

Behin zuhaitz bat egin dugunean, kopiatuz eta pegatuz (Ctrl/⌘-C, Ctrl/⌘-V) posible izango dugu zuhaitz guztiak identifikatzea modu erraz batean.

Txinako udarondo guztiak identifkatuta.

Gainera, parkean dauden beste elementu batzuk ere jar ditzakegu, hala nola bankuak edo iturriak.

Parkean dauden zuhaitzak (gerezi-aranondoak) eta bankuak lokalizatu ditut adibide honetan.

Behin aldaketa guztiak gordeta, denbora beharko du OSMk mapa gaurkotzeko, baina ordu batzuen buruan gure aldaketa guztiak eskuragarri izango dira.

Oraindik guztiz kargatu gabeko aldaketak, mapa gaurkotu bitartean.

OSM hezkuntza erabiltzeko ideia batzuk daude hemen: https://eu.wikipedia.org/wiki/Atari:Hezkuntza/Bigarren_Hezkuntza/OpenStreetMap,_herria_mapeatu

Gehiago irakurri

Euskal Wikilarien Kultura Elkarteak Eusko Jaurlaritzaren laguntzarekin egiten duen proiektu nagusia Hezkuntza Programa da. Helburua 12-16 urteko ikasleek behar dituzten edukiak hobetzea da, horretarako Unibertsitateko irakasle eta ikasleen, wikilarien eta Bigarren Hezkuntzako hainbat ikastetxeren laguntza izan dugu. 2.000 artikuluen zerrenda bat sortu dugu eta, pixkanaka, ari gara horiek hobetzen.

Gehiago irakurri