Author: Maddi Eseberri

Txikipedia 10.000 artikuluetara iritsi da eta etapa berri bati ekin dio

Data: 18 ekaina
Wikilaria: Maddi Eseberri
No comments
Kategoriak: Albiste orokorrak, Txikipedia

Txikipediak mugarri garrantzitsu bat lortu du: 10.000 artikuluen langa gainditu du. Euskarazko haurrentzako entziklopedia libreak hazten jarraitzen du, eta lorpen hori ospatzeko hainbat berrikuntza aurkeztu ditugu, proiektua erakargarriagoa eta hezitzaileagoa izan dadin.

Azken urteotan milaka artikulu sortu dira Txikipedian, haurrei eta gazteei egokitutako euskarazko edukia eskaintzeko. Baina artikulu kopurua handitzea ez da helburu bakarra. Horregatik, 10.000 artikuluen mugarri hau aprobetxatu dugu etxeko txikien esperientzia hobetzeko eta edukien antolaketan urrats berri bat emateko.

Azal berritua, nabigazio errazagoa

Txikipediaren azala berrantolatu dugu, atal desberdinen arteko oreka hobea lortzeko. Eduki dinamikoek protagonismo handiagoa hartu dute, hala nola ausazko artikuluek, IKUSGELAko “Zortziko Txikian” bideoek edo “Ba al dakizu?” atal ezagunak. Era berean, “Euskal Herriko historia 100 objektutan” proiektuko edukiak ere ikusgarritasun handiagoa izango du hemendik aurrera.

Helburua argia da: gaztetxoak esploratzera gonbidatzea, jakin-mina piztea eta ezagutza modu atseginagoan aurkeztea.

Atari tematiko berriak

Berrikuntza nagusietako bat atari tematikoen sorrera izan da. Historia, Astronomia, Euskal Herria, Bizia eta beste hainbat jakintza-arlo modu egituratuan aurkezteko guneak sortu ditugu.

Atari horiek ez dira bilatzailearen ordezko gisa pentsatu. Ikasleek, irakasleek eta familiek gai baten inguruko edukia modu antolatuan aurkitzeko tresna dira. Artikulu solteak irakurtzetik harago, jakintza-arlo oso batean murgiltzeko aukera eskaintzen dute, edukien arteko loturak agerian jarriz.

Informaziotik ulermenera

Adimen artifizialak informazioa eskuratzeko moduak aldatzen ari diren honetan, Txikipediak bere balio bereizgarria indartu nahi du: testuinguruan kokatutako ezagutza eskaintzea.

Helburua ez da soilik artikulu kopurua handitzea, baizik eta edukien arteko loturak eraikitzea, irakurketa-ibilbide esanguratsuak proposatzea eta gai baten ikuspegi zabalagoa eskaintzea. Azken finean, informazioa emateaz gain, ulermena sustatzea.

10.000 artikuluen langa gainditzeak agerian uzten du euskarazko ezagutza librearen komunitatearen indarra. Txikipediak hazten jarraituko du, haur eta gazteei euskarazko ezagutza librea eskaintzeko eta ikaskuntzarako tresna erabilgarri eta erakargarri izateko.

Txikipedia bisitatzeko, joan txikipedia.eus helbidera edo sartu euskarazko Wikipediaren bitartez. Proiektuaren berritasunen berri izan nahi baduzu, jarraitu Txikipediaren Mastodon kontua ere.

“Mitologia klasikoa” ikas-egoera berria argitaratu dugu Wikikasin 

Data: 15 maiatza
Wikilaria: Maddi Eseberri
No comments
Kategoriak: Albiste orokorrak, Hezkuntza

Wikikasi proiektuaren baitan, Talaios Kooperatibarekin batera sortutako ikas-egoera berri bat argitaratu dugu: “Mitologia klasikoa”. DBH 3. mailako ikasleei zuzendutako proposamen didaktiko honek kultura klasikoarekin lotutako mito eta kontakizunak lantzea du helburu, Wikimedia tresnak eta ezagutza librea oinarri hartuta. Ikas-egoera honetan kultura klasikoa, euskara eta literatura, eta hezkuntza plastikoa, ikusizkoa eta ikus-entzunezkoa izango dira lanketa-eremu nagusiak.

Ikas-egoeraren helburua mitologia klasikoaren inguruko lanketa sakona egitea da, ikasleak kultura arlo horretako kontakizun, pertsonaia eta sinboloen unibertsoan murgiltzeko. Horretarako, taldeka antolatuta, mito baten inguruko ikerketa-lana egin beharko dute: informazioa bilatu, kontrastatu eta antolatu, eta ondoren, Wikipedian edo Txikipedian, artikuluak sortu edo hobetuko dituzte.

Lanketa, ordea, ez da idatzizko ekarpenetara mugatuko. Ikasleek mito horren inguruko produkzio artistiko bat ere sortu beharko dute, ilustrazio baten bidez, egindako lana Wikimedia Commonsera igo. Horrela, ikasleak ez dira ezagutza-kontsumitzaile huts izango; sortzaile, ilustratzaile eta ezagutza librearen ekarle ere bihurtuko dira.

Ikas-egoeraren argudiaketa kurrikularrak azpimarratzen du mitologiak kultura klasikoaren mundu-ikuskerarekin izan duen lotura estua. Mitoek mendeetan iraun dute eta gaur egungo kulturan, hizkuntzan eta iruditerian arrasto sakona utzi dute, baina, askotan, ez da haien inguruko lanketa sakonik egiten. Proposamen honen bidez, ikasleek mito horien atzeko kontakizunak eta esanahiak ezagutuko dituzte, eta gaur egungo testuinguruan duten eragina hausnartuko dute.

Era berean, ikas-egoerak Wikimedia proiektuen erabilera sustatzen du, ikasleak tresna horien erabiltzaile ez ezik, haien eraikuntzan parte hartzen duten subjektu aktibo ere bihurtzen baitira. Euskarazko ezagutza librearen sorkuntzan ekarpena egiteaz gain, informazioaren fidagarritasuna, iturrien erabilera eta lankidetza digitala ere landuko dituzte.

“Mitologia klasikoa” ikas-egoera hemen dago eskuragarri:

https://eu.wikipedia.org/wiki/Atari:Hezkuntza/Wikikasi/Mitologia_klasikoa

Tabakalerak Medialab katalogoa Wikidatarekin lotu du: ezagutza irekiaren aldeko urratsa

Data: 06 maiatza
Wikilaria: Maddi Eseberri
No comments
Kategoriak: Albiste orokorrak, Wikidata

Tabakalerak beste pauso bat eman du ezagutza irekiaren eta datu irekien aldeko apustuan, Medialab katalogoa Wikidatarekin lotuz. Ekimen honek aukera ematen du katalogoan dauden edukiak ikusgarriagoak eta eskuragarriagoak izateko, Wikipedia bezalako proiektuak elikatzen dituen datu-base libre eta kolaboratiboarekin konektatuta.

Lotura honi esker, Medialab katalogoan dauden autore, sortzaile eta eragileen informazioa aberastu egiten da, eta testuinguru zabalago batean kokatzen da. Erabiltzaileek, gainera, fitxa bakoitzean informazio osatuagoa eskuratu dezakete: datu biografikoak, irudiak, beste iturri batzuetarako estekak edo Wikipediako artikuluetarako sarbideak.

WikiInfo tresna

Proiektu hau WikiInfo tresnaren bidez gauzatu da. Tresna horrek aukera ematen du katalogoko erregistroak automatikoki Wikidatarekin lotzeko eta informazioa modu dinamikoan eguneratzeko. Horrela, Wikidatan egindako hobekuntzak  (datu berriak edo zuzenketak) zuzenean islatzen dira katalogoan, eta sistema itxi bat izan zitekeena ingurune irekia eta kolaboratiboa bihurtzen da.

Gaur egun…

Gaur egun, Medialab Tabakaleraren katalogoak dituen 86.362 autoritate-erregistroetatik, 25.867  dagoeneko Wikidatarekin lotuta daude, eta horrek nabarmen handitzen du eduki horien irismena maila globalean.

Ekimen honek erakusten du nola uztartu daitezkeen tokiko katalogoak eta datu irekien nazioarteko ekosistema, eta nola bihur daitekeen informazio-sistema bat eguneroko erabilerarako tresna bizi eta aberatsago. Era berean, urrats garrantzitsua da kulturaren arloko eraldaketa digitalean, gardentasuna, berrikuntza eta lankidetza sustatuz.

Prozesu honetan, Euskal Wikilarien Kultura Elkarteak ere parte hartu dugu, lankidetza estuan, datu irekien eta ezagutza librearen aldeko apustu bateratuan.

https://katalogoa.tabakalera.eus

MUSEOTIK plataformarekin lankidetza berria “Euskal Herriko historia 100 objektutan” proiektuaren baitan

Data: 24 apirila
Wikilaria: Maddi Eseberri
No comments
Kategoriak: Albiste orokorrak, Ondarea

Euskal Wikilarien Kultura Elkarteak eta MUSEOTIK plataformak lankidetza berri bati ekin diogu, “Euskal Herriko historia 100 objektutan” proiektuaren baitan. Helburua argia da: ondare materiala ikuspegi zabalago batetik kontatzea, formatu anitzak uztartzea eta publiko handiago batengana iristea.

Aurrerantzean, hilean behin, hileko hirugarren astean, aukeratutako objektuak presentzia berezia izango du: objektu horren inguruko bideoa publikatuko da Ikusgelan. Eta aste horretan landutako objektua izango da, aldi berean, MUSEOTIK plataformaren astekoa. 

Ikusgelako bideoa

Esan bezala, lankidetza honen urrats garrantzitsua da objektu bakoitzaren inguruko bideo bat sortzea, Ikusgelaren “Zortziko Txikian” sailean argitaratuko dena. Eduki hori ere MUSEOTIK plataforman egongo da eskuragarri.

http://ikusgela.eus/

Objektu bera, plataforma desberdinetan

“100 objektu” proiektuaren barruan, objektu bakoitza hainbat formatutan lantzen da, jada: Wikipedia artikuluak, testu literarioa, podcasta eta komikia.

Lankidetza honen bidez, eduki horiek guztiak MUSEOTIK plataforman bateratuko dira, erabiltzaileentzat beste sarbide bat eta esperientzia osatuagoa eskaintzeko.

https://museotik.euskadi.eus/hasiera

Laboratoriumeko erakusketa

Lankidetza hau aurkezteko aukeratutakoa wolframa izan da. Testuinguru horretan, bat egiten du Laboratorium Museoan martxan dagoen W74: Boterea, arrazoia eta etorkizuna erakusketarekin. 

Wolframa, Euskal Herrian isolatu den elementu kimiko bakarra, Bergaran aurkitu zuten 1783an Juan Jose eta Fausto Elhuyar anaiek, Ilustrazio garaiko Errege Seminarioan egindako ikerketen baitan. Aurkikuntza honek zientziaren historian mugarri bat ezarri zuen, eta Bergara nazioarteko mapa zientifikoan kokatu zuen.

Gaur egun, ondare hori Laboratorium Museoan ezagutu daiteke, bertako erakusketa iraunkorrean zein une honetan ikusgai dagoen “W74: arrazoia, boterea eta etorkizuna” aldi baterako erakusketan. Azken honek wolframaren historia modu murgiltzaile eta garaikidean aurkezten du, XVIII. mendeko aurkikuntzatik abiatuta gaur egungo erabileretaraino, zientzia, industria eta gizartearen arteko loturak agerian jarriz.

https://laboratorium.eus/erakusketak/w74-boterea-arrazoia-eta-etorkizuna

Digitalizazio librea euskal hezkuntza askatzeko: jardunaldiaren kronika

Data: 10 martxoa
Wikilaria: Maddi Eseberri
No comments
Kategoriak: Albiste orokorrak, Hezkuntza

Otsailaren 25ean “Digitalizazio librea euskal hezkuntza askatzeko” jardunaldia egin genuen Errenteriako Torrekuan, Talaios Kooperatiba eta Badalabekin elkarlanean. Hezkuntza eragileak eta irakasleak bildu ginen.

Goiza Wikikasi proiektuaren “Erronka Digitalak” ikas-egoeraren aurkezpenarekin abiatu genuen, Badalab eta Talaiosen eskutik. Bertaratu zirenei azaldu zitzaien zer den ikas-egoera hau, zein diren bere helburu pedagogikoak eta zergatik sortu den. Proposamenak ingurune digitala bere osotasunean ulertzea eta ikuspegi kritikotik lantzea du xede, eta gaur egungo paradigma digitalak dituen eraginen aurrean hausnarketa sustatzea. Ikas-egoeraren egitura ere xehetasunez aurkeztu zen: nola dagoen antolatuta, zein atal dituen, zer baliabide eta material eskaintzen dituen eta nola aplikatu daitekeen ikasgelan. Halaber, erabilera praktikorako gidalerroak eta irakasleentzako laguntza-materialak partekatu ziren.

Goiza borobiltzeko, Nora Salbotxen hitzaldia izan genuen: “Wikikas-egoerak: elkarrentzako egiten jakin”. Galdera nagusi bati erantzun zion: zergatik ikas-egoerak bai? Marko teoriko sendo eta interesgarria plazaratu zuen, trebetasunak, jakintza eta ezagutzak ekintza bihurtzen dituen hezkuntza-eredu baten alde eginez. Wikipediatik abiatutako ikas-egoerek edukiak sentitzera, pentsatzera eta egitera gonbidatzen gaituztela azpimarratu zuen.

Jardunaldia galdera-erantzunen tartearekin eta solasaldi aberasgarriarekin amaitu zen. Parte-hartzaileen ekarpenek eta interesak agerian utzi zuten digitalizazio librea eta ikuspegi kritikoa hezkuntzan lantzeko beharra eta gogoa badirela.

Eskerrik asko etorri zineten guztioi. Lanean jarraituko dugu, hezkuntza askatzeko bidean, Wikimedia eta ezagutza librea bidelagun.

Laburpen bideoa: https://youtu.be/PKkCjcniLc0

“Wikipediatik ikasgelara”: hezkuntza baliabide irekien katalogoa 

Data: 25 otsaila
Wikilaria: Maddi Eseberri
No comments
Kategoriak: Hezkuntza

Azken urteotan egindako lanaren emaitza bateratu eta ikusgarri egin dugu: “Wikipediatik ikasgelara” hezkuntza baliabide irekien katalogoa prest dago, eta zabaltzen hasi gara.

Katalogo honek ez du soilik sortutako proiektuen zerrenda eskaintzen; gure hezkuntza-ikuspegia sistematizatzen du. Ikusgela, WikIkasi, Txikipedia, Ikasi Otsorekin eta bestelako egitasmoen bidez, landutako baliabideak egituratuta aurkezten dira, Derrigorrezko Bigarren Hezkuntzarako eta Batxilergorako egokituak eta curriculumarekin koherentziaz lerrokatuak. Dokumentua, hortaz, tresna praktikoa izateaz gain, azken urteotako lan pedagogikoaren isla ere bada.

Gure jardunaren oinarrian ideia bat dago: ezagutza ez da kontsumitzeko objektu hutsa, eraikitzeko prozesua baizik. Hezkuntzak ikaslea subjektu aktibo bihurtu behar du, informazioa bildu, kontrastatu, egituratu eta berridazteko gai izango dena. Horregatik, gure proposamenek Wikimedia proiektuetan dute euskarri nagusia. Ikasgelan sortutako lana espazio publiko eta kolaboratibo batean kokatzen da, eta horrek ikaskuntzari zentzu sozial eta partekatua ematen dio.

Katalogoan jasotako baliabideek askotariko formatuak biltzen dituzte: bideo pedagogikoak, ikas-egoerak, komikiak, artikuluak eta bestelako euskarriak. Proiektu bakoitza elkarlanean garatu da, hezkuntza-eragile, aditu eta sortzaileekin batera, edukiaren zehaztasuna eta egokitasun didaktikoa bermatzeko. Dokumentua, beraz, baliabideen aurkezpena ez ezik, atzean dagoen lan kolektiboaren adierazpena ere bada.

Zabalkunde fase berri bati ekin diogu oraingoan. Katalogoa ikastetxe eta institutuetan aurkezten hasiko gara, bilera eta topaketa zuzenen bidez. Helburua ez da dokumentua hedatzea soilik: elkarrizketa sustatu nahi dugu. Nola erabili baliabide hauek? Nola egokitu ikasgelako errealitatera?

Elkarteko kideek eta hezkuntza-komunitateak zeregin erabakigarria dute prozesu honetan. Ezagutza librearen aldeko apustua kolektiboa da, eta hezkuntza-eremuan sakontzea funtsezkoa zaigu. Katalogo hau ez da helmuga bat, baizik eta beste urrats bat ibilbide partekatu batean.

Katalogoaren zabalkundearekin batera, Wiki Irakasleak izeneko Instagram kontua ere jarri dugu martxan. Irakasleei zuzendutako espazio digitala da, non proiektu hauen eguneraketak, ikasgelan erabiltzeko jarduera-proposamenak eta baliabide praktikoak partekatuko ditugun. Katalogoan jasotakoa osatzeko eta eguneroko jardunean lagungarri izango den komunitate-sare bat eraikitzea da asmoa.

Katalogoa deskargatu nahi baduzu, Commonsen dago eskuragarri: https://commons.wikimedia.org/wiki/File:Wikipediatik_ikasgelara.pdf

“Wiki irakasleak” instagram kontua: https://www.instagram.com/wikirakasleak?igsh=MWR6Mjl4a3R1aHJkMg%3D%3D&utm_source=qr

Otsailaren 25ean “Digitalizazio librea euskal hezkuntza askatzeko” jardunaldia

Data: 11 otsaila
Wikilaria: Maddi Eseberri
No comments
Kategoriak: Hezkuntza

Otsailaren 25ean, goizeko 10:00etatik 13:00etara, Torrekuan digitalizazio librearen inguruko jardunaldia egingo da. Topaketa honetan hezkuntzaren digitalizazioa beste ikuspegi batetik aztertuko da.

Jardunaldian zehar, Wikikasi proiektua aurkeztuko dugu, baita azken hilabeteetan Talaios Kooperatiba eta Badalabekin landu dugun “Erronka digitala” ikas-egoera ere. Gainera, Nora Salbotxen hitzaldiaz gozatzeko aukera izango dugu, jakintza eta ekintza lotzen dituen hezkuntza-ereduaz hausnartzeko.

Wikikasi: Wikimedia bidezko ikas-egoera libreak

Euskal Wikilarien Kultura Elkarteak, Talaiosen laguntzarekin, bigarren hezkuntzarako bideratutako Wikikasi ikas-egoerak sortu ditu. Wikimedia tresnak darabiltzaten proposamen pedagogiko libreak dira, eta Euskal Autonomia Erkidegoko legearen markoan kokatzen dira.

Helburua bederatzi ikas-egoera sortzea da; gaur egun, sei daude argitaratuta. Jardunaldian, proiektuaren oinarriak eta ikasgeletan aplikatzeko moduak azalduko ditugu.

Erronka digitala: ingurune digitala ikuspegi kritikotik lantzeko

Badalab eta Talaiosen elkarlanean sortutako azken ikas-egoera ere, “Erronka digitala”, aurkeztuko dugu otsailaren 25eko jardunaldian. Proposamen honek ingurune digitala bere osotasunean ulertu eta ikuspegi kritikotik lantzea du helburu.

Paradigma digitalak aldaketa sakonak eragin ditu hezkuntzan eta gizartean; hortaz, ezinbestekoa da ikasleekin hausnarketa hori modu egituratuan eta pedagogikoan lantzea. Jardunaldian, ikas-egoera hau martxan jartzeko gidalerro praktikoak eskainiko ditugu.

Nora Salbotx: jakintzatik ekintzara

Goiza biribiltzeko, 11:45etik aurrera, Nora Salbotxek “Wikikas-egoerak: elkarrentzako egiten jakin” hitzaldia eskainiko du. Bertan, trebetasunak, jakintza eta ezagutzak ekintza bihurtzen dituen hezkuntzaz hausnartuko dugu, Wikipediak proposatutako ikas-egoeren bidetik. Curriculumeko edukiak sentitzera, pentsatzera eta egitera gonbidatzen gaituen ikuspegia landuko da.

Egitaraua:

10:00 – 10:15 → Aurkezpena Wikikasi

10:15 – 11:00 → Erronka digitala Ikas-egoera

11:00 – 11:15 → Galdera erronda

11:15 – 11:45 → Atsedenaldia

11:45 – 12:30 → “Wikikas-egoerak: elkarrentzako egiten jakin” Nora Salbotx

12:30 – 12:45 → Galderak

Parte hartu nahi baduzu, izena eman dezakezu hemen:

https://torrekua.eus/agenda/ekitaldiak/wikikasi-2026-02-25

Diximed pediatriarako: osasun-hiztegia euskaraz 

Data: 02 otsaila
Wikilaria: Maddi Eseberri
No comments
Kategoriak: Hezkuntza

Txikipedia elikatzeko eta haurren ezagutza librea euskaraz indartzeko urrats berri bat eman dugu Diximed pediatriarako proiektuaren bidez. Lankidetza honi esker, Txikipediako ehun artikulu baino gehiagotan audioak egongo dira.

Testuinguru horretan, gaur Diximed pediatriarako sare-hiztegiaren aurkezpenean izan da. Eta aukera izan dugu ikusteko nola batzen diren osasuna, hizkuntza, hezkuntza eta ezagutza librea ekimen berean.

Diximed pediatriarako 6 eta 12 urte bitarteko haurrei zuzendutako sare-hiztegi eleaniztuna da, medikuntzako oinarrizko kontzeptuak modu ulergarrian azaltzeko sortua. Ataria orain arte katalanez, gaztelaniaz, galegoz eta ingelesez zegoen erabilgarri; orain, euskarazko bertsioa ere eskuragarri dago.

Web atarian eduki ugari daude eskuragarri: 300 termino baino gehiagoko medikuntzako hiztegi orokorra, COVID-19ari lotutako hiztegi osagarria, giza gorputzaren atlasa, infografiak eta jolas interaktiboak, baita haurren marrazkiak eta audioak ere, terminoak azaltzeko.

Jatorria eta bidea

Proiektua jatorriz Rosa Estopàk sortu eta zuzendu zuen, Universitat Pompeu Fabrako IULATERM ikerketa-taldearen baitan. Denboran zehar, eskoletako milaka ikaslek, eta aditu desberdinek, hala nola, hizkuntzalari eta terminologoek, hartu dute parte, eta emaitza haurrei zuzendutako baliabide digital sendo eta fidagarria izan da. 

Euskal Herrian, lankidetza zabal baten bidez

Euskarazko bertsioa EHUko Euskara eta Hizkuntza Plangintzarako Errektoreordetzak bultzatu du. Testuen itzulpena Elhuyarrek egin du, EHUko Hizkuntza Zerbitzuarekin eta Terminologia Plangintzarako arduradunekin lankidetzan. 

Euskal Wikilarien Kultura Elkarteak, Orokieta Herri Eskolako ikasleekin hiztegiaren terminoen euskarazko audioak grabatu ditugu. Horrela, definizioak testu hutsetik harago doaz, eta haurren hizkuntza-errealitatera are gehiago hurbiltzen dira. 

Ezagutza librea eta hezkuntza, eskutik

Esan bezala, ekimen honek jarraipena ematen dio Txikipedia bezalako proiektuekin hasitako bideari. Helburua argia da: zientzietako eta osasuneko oinarrizko ezagutza euskaraz, libre eta haurrek ulertzeko moduan eskaintzea. 

Aurkezpenean bertan ikusi dugu nola bihurtzen diren ikasleak ezagutza-hartzaile izatetik ezagutza-sortzaile izatera, euren ahotsa eta irudimena proiektuaren oinarri eginez.

Diximed pediatriarako euskarazko web ataria hemen dago eskuragarri:

Hasiera

Urte amaierako erronka Wikipedian: 26 zenbakiarekin amaitzen diren urteak

Data: 16 abendua
Wikilaria: Maddi Eseberri
No comments
Kategoriak: Albiste orokorrak

Urte amaiera aukera bikaina da atzera begiratu, datak eta gertakariak berrikusi, eta ezagutza pixka bat gehiago txukuntzeko. Horregatik, euskarazko Wikipedian erronka berezi bat jarri da martxan: 26 zenbakiarekin amaitzen diren urteetako efemerideak hobetzea.

Helburua sinplea da, baina esanguratsua: 2026. urteari ongietorria ematea eta iraganeko urte horietan gertatutakoa hobeto dokumentatzea. 26, 626, 1326, 1726 edo 1826 bezalako urteak lantzea proposatzen da, bakoitzean gertatutako jaiotzak, heriotzak edo bestelako gertaera aipagarriak osatzeko edo aberasteko.

Erronkan parte hartzeko, efemerideen artikuluak lantzeaz gain, horiekin lotutako biografiak edo bestelako artikuluak hobetu edo gehitu ahal dira. Gakoa loturak ondo jartzea da: gertakariak dagokion urtean eta egunean agertu behar du, testuingurua osatzeko.

Parte-hartzaile guztiek mezu berezi bat jasoko dute euren eztabaida-orrian. Gainera, lehen hiru sailkatuek postal berezia izango dute.

Erronka 2025eko abenduaren 16tik 31ra egongo da zabalik. Ekarpen handiak zein txikiak ongie torriak izango dira: efemeride bakar batek ere balio du ezagutza partekatzeko eta euskarazko Wikipedia elikatzen jarraitzeko.

Animatu parte hartzera eta denon artean eman diezaiogun 2026. urteari harrera ezin hobea Wikipedian! 

Euskarazko Wikipediak 24 urte bete ditu, eta munduko lehen postuan kokatu da oinarrizko 1.000 artikuluen zerrendan 

Data: 10 abendua
Wikilaria: Maddi Eseberri
No comments
Kategoriak: Albiste orokorrak

Euskarazko Wikipediak urte berezia ospatzen du aurten. Abenduaren 6an 24 urte bete ditu, eta urteurrena ez da nolanahikoa izan: azken hilabeteko neurketaren arabera, euskara da mundu osoan “Wikipedia guztiek izan beharreko 1.000 artikuluak” sakontasun handiz beteta dituen hizkuntza bakarra.

Hau da, gaur-gaurkoz, ez dago beste hizkuntzarik zerrendako artikulu guztiak 30.000 byte baino gehiagoko luzerarekin eguneratuta dituenik. Wikilariek urteetan zehar egindako auzolanaren fruitu zuzena da lorpena.

Zer da “Wikipedia guztiek izan beharreko 1.000 artikuluen zerrenda”?

Wikipedian bada zerrenda estrategikoa: “Wikipedia guztiek izan beharreko 1.000 artikuluak”. Helburua da hizkuntza guztiek oinarrizko ezagutza orokorra osatzen duten artikuluak izatea: geografia, historia, zientzia, artea, giza eskubideak, pertsonaia esanguratsuak…

Horrez gain, zerrenda ez da edukien presentzia hutsa neurtzeko: zenbateraino dauden landuta ere kontuan hartzen da. Horretarako, hizkuntza bakoitzera egokitutako byte kopuruaren bidez, artikuluen luzera eta sakontasuna aztertzen dira, Oro har, 30.000 bytetik gorako artikuluak jotzen dira sarrera “luzetzat” eta “sakontzat”.

Munduan dauden 340 Wikipedietatik, soilik 23 hizkuntzek dute zerrendako 1.000 artikuluak osorik; baina euskarazkoa da bakarra artikulu horiek guztiak 30.000 byteko sakontasun-muga gaindituta dituen hizkuntza.

Nola lortu da lorpen hau?

Azken hiru urteetan, Euskal wikilariek modu antolatuan jardun dute zerrendako artikuluak berritzen, luzatzen, eguneratzen eta sakontzen. 

Horretarako, sortu zen lankidetza egituratua: “Wikiproiektu: Wikipedia guztiek izan beharreko 1.000 artikuluen zerrenda”.

Hainbat wikilari aritu dira lanean: testuak berridazten, bibliografia fidagarria txertatzen, artikulu estandarrak bateratzen eta nazioarteko irizpideetara egokitzen. Auzolan horrek eraman gaitu gaurko egoerara: euskarazko Wikipedia da munduko estaldura sakonenekoa 1.000 artikuluko zerrenda horretan.

Hurrengo erronka: 10.000 artikulu nagusien zerrenda

Etapa hau gaindituta, komunitateak erronka handiago bati helduko dio: “Wikipedia guztiek izan beharreko 10.000 artikuluak” egiteari, hain zuzen ere.

Zerrenda zabalago horretan euskara 17. postuan dago une honetan, eta hurrengo urteetako lehentasuna izango da zerrenda horretako artikuluak sakontzea.