Wikipedia munduko bosgarren webgunerik bisitatuena da eta, dagoeneko, Entziklopediarik ezagunena. Era berean, Euskarazko Wikipedia euskarazko webgunerik bisitatuena da. Egunero milaka pertsonek erabiltzen dute ezagutza eskuratu eta gai askoren inguruan ikasteko. Euskal Wikilarien Kultura Elkartearen (EWKE) helburua euskarazko Wikipedia sustatzea da, munduko ezagutza guztia guztion esku jarriz, auzolanean, instituzio eta elkarte ezberdinen laguntzarekin.
Author: admin
Europako copyright lege-aldaketa: Wikipedia arriskuan
Argazkia: Fred Schaerli. cc-by-sa-3.0 lizentzia.
Europar Batasuna “Merkatu digital bateraturako egile eskubideen direktiba” berria prestatzen ari da, Internet eta ezagutza librea arriskuan jar ditzakeen direktiba berria. Proposamena ekainaren 20 eta 21ean bozkatuko da JURI batzordean, eta uztaila eta iraila artean Europako Parlamentuan. Lege honek dituen hainbat neurrik sarearen neutraltasuna arriskuan jarriko du, hala nola adierazpen askatasuna, sareko elkarlana eta dibertsitatea. Europarlamentarioei eskatzen diegu besteak beste Wikipedia arriskuan jartzen duen lege honen aurka bozkatzea.
Wikiteka jaio da, euskarazko liburu libreen biltegia
Gure familiako proiekturik ezagunena Wikisource da, egunero bisitatzen dugun Entziklopedia Askea. Baina baditugu ere bestelako proiektuak: Wikimedia Commons da munduko irudi libreen biltegirik handiena; edo Wikidata, datubase erraldoia; baita Wikhiztegia, hiztegi libre eleanitza sortzeko proiektua. Ezezagunagoa den Wikisource azaltzeko unea da: izan ere euskarazko domeinua eta izena jaso du, Wikiteka jaio da liburuaren egunarekin bat.
«Emakumea historian eta emakumeen historia» lehiaketa martxoan
Urtarrilean Afrikako Historia izan genuen gurean; otsailean euskal musikari egin diogu tartea… eta martxoan badator “Emakumea historian eta emakumeen historia” lehiaketa euskarazko Wikipediara. 1.000 artikulutik gora lantzeko aukera egongo da, historian garrantzia izan duten hainbat emakume zein emakumeen historia lantzen dutenak. Lau sari izango dira oraingoan, gaiari lotutako euskarazko entseguak. Parte hartzeko aukera duzu https://eu.wikipedia.org/wiki/Atari:Hezkuntza/Lehiaketak/2018/03 helbidean.
Matxin itzultzaile automatikoa integratu dute Wikipedian
Matxin itzultzaile automatikoa da gaztelania > euskara itzulpenak egiteko dagoen tresnarik onena. Urteetako garapena izan du IXA taldea eta Elhuyarren aldetik, eta perfektua ez bada ere (itzultzaile automatikoak ez dira perfektuak) emaitza txukunak ematen ditu testuen itzulpenean. Ia urte bateko lanaren ostean, Wikimediak sortutako Content Translation tresnan barneratu da gaur, eta dagoeneko prest dago itzulpenak egiteko.
Badok.eus askatuz hasiko da otsailean #MusikaLehiaketa
Hezkuntza Programa martxan jarri genuenean, hainbat proiektu Creative Commons lizentziapean jartzeko lanean hasi ginen. Tartean, Berriak egindako hiru proiekturen testua askatzea jarri genuen helburutzat: Espainiako Gerra Zibilari buruzko Oroiteria, GAL 30 urte eta Badok.eus. Azken hau otsailaren 1ean hasiko den #MusikaLehiaketa hilabeteko lehiaketan erabiltzeko tresna ezinbestekoa izango da. Lehiaketa jarri dugu martxan, bai… eta bideo honekin iragarri nahi dugu:
Wikisource ikastaroa urtarrilaren 26an Donostian
Wikisource jatorrizko lanak igo eta transkribatzeko Wikimedia fundazioaren proiektua da. Liburutegi libre bat da, Wikipedian egon daitezkeen artikuluen osagarri, baina aukera asko zabaltzen dituena. Euskaraz ez dugu oraindik proiektu hau martxan, nahiz eta badiren “Wikisource eleanitza” deiturikoan euskarazko testu asko. Duen potentziala aztertu eta egin daitekeena ikasteko aukera izango dugu urtarrilaren 26an Donostiako Tabakaleran antolatu dugun ikastaroan.
Afrikako historiarekin hasiko dugu hilabeteroko lehiaketa
Wikipedian hainbat hutsune ditugu, eta horietako batzuk estaltzen saiatuko gara abian dugun Hezkuntza Programaren baitan martxan jarri dugun hilabeteroko lehiaketarekin. Afrikako historiarekin hasiko gara, baina beste hainbat gai jorratuko ditugu aurten: dinosauroetatik gastronomiara, emakumeen historiatik giza anatomiara eta sexualitatetik langile mugimenduaren historiara. Sari bereziak izango dira hilabetero, edizio kopurua kontutan hartuta, norvegierazko Wikipedian diseinatutako bot bat erabilita.
Photocalla Durangoko Azokan: kulturgileen argazki libreak beharrezko direlako
Urtero ehunka proposamen berri aurkezten dira Durangoko Azokan: diskak, liburuak, aldizkariak, antzerkia… Azoka bat da, baina sortzaileak biltzeko gune bat ere bada. Urtero ehunka sortzailek euren proposamenak aurkezten dituzte Durangon, eta sortzaile horien guztien argazkiak ez ditugu libre, Euskarazko Wikipedian, adibidez, erabili ahal izateko. Azkue Fundazioarekin batera egoera honi buelta emateko soluzio bat eskainiko dugu aurten Durangoko Azokan bertan: Photocall bat. Kulturgileak animatu nahi ditugu bertan argazkia egitera, kultura libreki hedatu ahal izateko.
Abenduaren 8an Wikipedia Eguna Durangoko Azokan
Durangoko Azoka dator, urtero kultura eta sorkuntzarekin dugun zita garrantzitsua. Aurten 400 berrikuntza izango dira eskuragarri bertan, baita zuzeneko 200 ekitaldi baino gehiago ere. Tartean, Euskal Wikilarien Kultura Elkarteak abenduaren 8an Wikipedia Eguna antolatu du Kabi@ gunean.